Polisin saxladığı maşının salonundan və motorxanasından iki avtomat çıxdı - VİDEO

Polis tərəfindən saxlanılan avtomobilin salonundan və motorxanasından iki ədəd “Kalaşnikov” avtomatı götürülüb. Avtosfer.az xəbər verir ki, hadisə Türkiyənin Diyarbəkir şəhərində baş verib.

Belə ki, motosikletli polis qrupları Yenişehir mahalında patrul xidməti zamanı şübhəli bir avtomobili saxlayıb. Asayiş keşikçiləri əvvəlcə avtomobildə olan şəxsləri nəzarətə götürərək maşından düşürüblər. Onların üzərinə baxış zamanı heç bir qeyri-qanuni əşya tapa bilməyən polis əməkdaşları şəxslərin narahat davranışından şübhələnib.

Polislər axtarışı bu dəfə avtomobildə ediblər. Maşının salonuna və motorxana hissəsinə baxış zamanı oradan 2 ədəd “AK-47” “Kalaşnikov” avtomat, onlar üçün 4 ədəd maqazin və 300 ədəd 7,62x39 çaplı patron götürüblər.

İki şübhəli polis bölməsinə aparılıblar. Barələrində toplanmış materiallar məhkəməyə göndərilib. Hakimin qərarı ilə şübhəlilərdən biri həbs edilib, digəri isə şərti olaraq sərbəst buraxılıb.

Namiq Musayev