Qanunsuz parklama yerində “parkovşik” sürücünü şərləməyə çalışıb - VİDEO

Paytaxtda qanunsuz təşkil edilən parklanma yerində şirkətə məxsus yük maşınını idarə edən şəxs əraziyə nəzarət edən “parkovşik” tərəfindən şərlənib.

Avtosfer.az xəbər verir ki, nəzarətçi ona mane olaraq özünü maşının önünə atıb. Ayağını maşının altında qalmış kimi göstərməyə çalışan “parkovşik” bu üsulla istəyinə nail ola bilməyəcəyini görüb və əlindəki taxta dəyənəklə sürücünü vurub.

Daha sonra digər maşının arxasına keçərək ayağını tutan nəzarətçinin başına görüntülər çəkilən binanın yuxarı mərtəbələrindən kələm atılıb. Baş verənlərə təmkinlə yanaşan sürücü isə nəzarətçi ilə münaqişəyə girməyərək ərazidən uzaqlaşıb.

Bina sakinləri deyir ki, “parkovşik” hər dəfə kimləsə mübahisə edir. Hətta sakinlərdən bəziləri ilə əlbəyaxa dava da edib.

Qeyd edək ki, belə qanunsuz parklama yerlərinin təşkil etmək 2000 manat cərimə ilə nəticələnir.

Səfər Əlizadə