Respublika Olimpiya Mərkəzinin rəhbər şəxsi piyadanı vuraraq öldürdü

Nərimanov Rayon Məhkəməsində yol qəzası törətməkdə təqsirləndirilən M.M.-in (ad, soyadı şərti) cinayət işi üzrə məhkəmə istintaqı yekunlaşıb. Avtosfer.az-ın Pravda.az-a istinadən məlumatına görə, hakim Gültəkin Əsədovanın sədrliyi ilə keçirilən prosesdə hökm oxunub.

Məhkəmənin hökmü ilə o, cəzasını məntəqə tipli cəzaçəkmə müəssisəsində çəkməklə 3 il müddətinə azadlıqdan məhrum edilib.

İttihama görə, hadisə 18 fevral 2024-cü il tarixdə, saat 19:21 radələrində paytaxtın Nərimanov rayonu, F.X.Xoyski küçəsi ilə üzü Koroğlu Rəhimov küçələrinin kəsişməsi istiqamətində qeydə alınıb.

Belə ki, M.M. etibarnamə əsasında idarə etdiyi “Kia Sportage” markalı avtomobillə hərəkətdə olarkən yolu piyada zolağı ilə sola doğru qaçaraq keçmək istəyən piyada N.Həsənovanı vurub. Ağır bədən xəsarəti alan piyada 12 iyun 2024-cü il tarixdə müalicə aldığı “Yeni Klinika”da ölüb.

M.M. məhkəmədə ona qarşı irəli sürülmüş ittiham üzrə özünü təqsirli bilərək ifadəsində göstərib ki, rəsmi olaraq Respublika Olimpiya Mərkəzində müdir müavini vəzifəsində işləyir. Etibarnamə ilə idarə etdiyi həmin avtomobil qeydiyyat şəhadətnaməsi ilə anasının adınadır.

Məhkəmə iclasında videokanfrans vasitəsilə zərərçəkmiş şəxsin hüquqi varisi olan oğlu dindirilərkən bildirib ki, anası rəsmi olaraq heç bir yerdə işləməsə də, fərdi qaydada gözəllik salonunda saç ustası kimi fəaliyyət göstərirdi.