Sərmayə qoymaq üçün Bakıya gələn iş adamını qaraçılar soydular

Səbail rayonunun Nizami küçəsində, "Torqovı" adlanan ərazidə Pakistan vətəndaşına qarşı soyğunçuluq edən 20 yaşlı qadın barəsində məhkəmə hökmü elan edilib.

Avtosfer.az "Qaynarinfo"ya istinadən xəbər verir ki, 2005-ci ildə Yevlax şəhərində anadan olmuş Ulduza Bukaviz barəsində Azərbaycan Respublikası Cinayət Məcəlləsinin 177.2.1 (bir qrup şəxs tərəfindən törədildikdə), 177.2.4 (təkrar törədildikdə) və 177.2.5 (azyaşlı şəxs tərəfindən törədildikdə) maddələri üzrə açılmış cinayət işinə məhkəmədə baxılıb.

Araşdırmalar zamanı məlum olub ki, Ulduza Bukavizin azyaşlı bacıları - 12, 15 və 16 yaşlarında olan qızlar, eləcə də iki digər qohumu ilə birlikdə həmin ərazidə dilənçiliklə məşğul olublar.

Onlar "Torqovı"da gəzən üç Pakistan vətəndaşına yaxınlaşaraq pul istəyiblər. İstəkləri cavabsız qaldıqda qadınlar Jameel adlı Pakistanlı iş adamını əhatəyə alıblar. Bu zaman qızlardan üçü onun diqqətini yayındıraraq israrla pul istəməyə başlayıblar. Onlardan biri hətta əlləri ilə onun ayaqlarından tutaraq yalvarışla pul istəyib. Bu vaxt Ulduzanın 12 yaşlı bacısı Leyla Bukaviz gizlicə iş adamının cibindən 3 500 ABŞ dolları götürüb və ərazidən uzaqlaşıblar.

Əldə olunan pul Ulduza Bukavizin bacıları və qohumları arasında bölüşdürülüb.

Zərərçəkmiş şəxs, iş adamı Jameel ifadəsində bildirib ki, Pakistan İslam Respublikasının vətəndaşıdır, işləri ilə bağlı həm Pakistanda, həm də Dubayda yaşayır. Azərbaycana isə investisiya yatırmaq və iş qurmaq məqsədilə gəlib. O, hadisə ilə bağlı Ulduza Bukavizdən şikayətçi olmadığını, maddi ziyanın isə ödənildiyini qeyd edib.

Məhkəmənin hökmü ilə Ulduza Bukaviz barəsində 1 il 11 ay 28 gün müddətinə azadlığın məhdudlaşdırılması cəzası təyin olunub. Həmin müddət ərzində o, Yevlax rayonunun ərazisini tərk etməməli və elektron nəzarət qolbağı ilə nəzarətdə saxlanacaq.