“Sputnik Azərbaycan”ın icraçı direktoru və şef redaktoru həbsdə qaldı

Bu gün Bakı məhkəməsi "Sputnik"in jurnalistləri İqor Kartavıx və Yevgeni Belousovun vəkillərinin həbs-qətimkan tədbirinin dəyişdirilməsi ilə bağlı apellyasiya şikayətini təmin etməyib.

Avtosfer.az APA-ya istinadən xəbər verir ki, birinci instansiya məhkəməsinin həbs qətimkan tədbirinin seçilməsi barədə qərarı qüvvədə saxlanılıb.

Qeyd edək ki, bir neçə gün bundan əvvəl Daxili İşlər Nazirliyi (DİN) “Rossiya Seqodnya" İnformasiya Agentliyinin Bakı filialında (“Sputnik Azərbaycan”) əməliyyat keçirib.

Əməliyyat zamanı “Sputnik Azərbaycan”ın icraçı direktoru İqor Kartavıx və şef redaktor Yevgeniy Belousov saxlanılıb.

Daha sonra məhkəmə onların barəsində 4 aylıq həbs qətimkan tədbiri seçilib.

Onlara Cinayət Məcəlləsinin 178.3.1-ci (Dələduzluq, mütəşəkkil dəstə tərəfindən törədildikdə) , 192.2.2-ci (Qanunsuz sahibkarlıq, külli miqdarda gəlir əldə etməklə törədildikdə), 192.2.3-cü (Qanunsuz sahibkarlıq, mütəşəkkil dəstə tərəfindən törədildikdə), 193-1.3.1-ci (Cinayət yolu ilə əldə edilmiş əmlakı leqallaşdırma, mütəşəkkil dəstə və ya cinayətkar birlik (cinayətkar təşkilat) tərəfindən törədildikdə) və 193-1.3.2-ci (Cinayət yolu ilə əldə edilmiş əmlakı leqallaşdırma, xeyli miqdarda törədildikdə) maddələri üzrə ittiham elan olunub.