“Telefonda oyun oynamaq istəyib, anası vermədiyi üçün bıçaqlayıb” - VİDEO

Xaçmaz rayonunun Qadaşoba kəndində 15 yaşlı yeniyetmənin anasını qətlə yetirməsinin təfərrüatı məlum olub.

Avtosfer.az xəbər verir ki, mərhum Kifayət Lətifovanın qohumu Ceyhun Mustafayev Baku TV-yə açıqlamasında bildirib ki, qətl törədilərkən evdə yeniyetmə ilə anasından başqa heç kim olmayıb.

“Uşağın dediyinə görə, oyun oynamaq üçün anasından telefon istəyib, vermədiyi üçün də onu bıçaqlayıb. Hadisəni biləndə hamımız şoka düşdük. Belə hərəkət edəcək uşaq deyildi”, - deyə o söyləyib.

Mərhumun bacısı Mehparə Məlikova isə hadisə barədə belə deyib: “Bacım evində özünə cəllad saxlayıb. Oğlu onu çox sevirdi. Bizə gələndə anası olmadan yatmırdı. İki dəfə əməliyyat etdirib. Uşağın bir az problemi var idi”.

Qeyd edək ki, 15 yaşlı yeniyetmə bu il 9-cu sinifi bitirib. O, anası K. Lətifovanı qətlə yetirməkdə şübhəli bilinərək polis əməkdaşları tərəfindən saxlanılıb.

Faktla bağlı Xaçmaz Rayon Prokurorluğunda cinayət işi başlanılıb, istintaq araşdırmaları aparılır.