Təyyarənin şassi bölməsində biletsiz sərnişinin cansız bədəni aşkarlandı

Şimali Karolina ştatının Şarlott şəhərinin hava limanında "American Airlines" aviaşirkətinə məxsus təyyarənin şassi bölməsində biletsiz sərnişinin cəsədi aşkar edilib.

Avtosfer.az-ın "CBS News"a istinadən məlumatına görə, hadisə Avropadan Şarlott beynəlxalq hava limanına gələn reysdə baş verib.

Polisin verdiyi məlumata əsasən, cəsədi texniki briqadalar aşkarlayıb və hadisə yerinə gələn təcili yardım əməkdaşları sərnişinin ölümünü təsdiqləyiblər.

Şarlott hava limanı rəsmiləri hadisədən xəbərdar olduqlarını təsdiqləyib və lazım olduqda araşdırmaya qoşulacaqlarını bildiriblər.

Xatırladaq ki, bir müddət əvvəl 13 yaşlı əfqanıstanlı yeniyetmə sərnişin təyyarəsinin şassi hissəsində gizlənərək Kabildən Hindistanın Delhi şəhərinə uçmuş və aeroporta sağ-salamat enmişdi.