Xəstəxana bağbanını maşın vuraraq öldürdü

Lənkəran Ağır Cinayətlər Məhkəməsində yol qəzası törətməkdə təqsirləndirilən Abid Əsədovun (şərti) cinayət işi üzrə məhkəmə iclası başa çatıb. Avtosfer.az-ın Pravda.az-a istinadən məlumatına görə, hakim Esmira Məmmədovanın sədrliyi ilə keçirilən prosesdə hökm oxunub.

Məhkəmənin hökmü ilə o, 5 il 6 ay müddətinə azadlıqdan məhrum edilib. Təqsirləndirilən şəxs haqqında seçilmiş başqa yerə getməmək barədə iltizam qətimkan tədbiri dəyişdirilərək, həbs qətimkan tədbiri ilə əvəz olunub. Abid Əsədov məhkəmə iclas zalında dərhal həbs edilib.

İttihama görə, hadisə 15 yanvar 2024-cü il tarixdə, saat 19:30 radələrində Mingəçevir-Bəhrəmtəpə yolunun Ağcabədi rayonu, Qaravəlli kəndi ərazisindən keçən hissəsində qeydə alınıb.

Belə ki, təqsirləndirilən Abid Əsədov idarə etdiyi “VAZ-21063” markalı avtomobillə hərəkətdə olarkən yolun kənarında dayanmış piyadaları və “Mercedes- Benz Actros” yük maşınını arxa sol hissədən vurub. Nəticədə Elşən Abdullayevlə Rəfael Kərimov dünyasını dəyişib.

Hadisədən sonra Abid Əsədov saxlanılaraq cinayət məsuliyyətinə cəlb edilib.

Elşən Abdullayev Tərtər Rayon Mərkəzi Xəstəxanasında bağban kimi çalışıb. Hadisə günü xəstəxanadan onları oksigen balonları gətirmək üçün Ağcabədi rayonuna göndəriblərmiş.