Yanacaqdoldurma məntəqəsinin ərazisində güclü yanğın... - VİDEO

Abşeron rayonunun Məmmədli dairəsi ərazisində yerləşən obyektlərdə güclü yanğın başlayıb.

Avtosfer.az Oxu.Az-a istinadən xəbər verir ki, alov qısa müddətdə geniş əraziyə yayılıb.

Hadisə şahidinin sözlərinə görə, yanan tikilidə müxtəlif təyinatlı, o cümlədən yem satışı və avtomobil ehtiyat hissələrinin satışı ilə məşğul olan obyektlər fəaliyyət göstərir.

Əraziyə Fövqəladə Hallar Nazirliyinin müvafiq qüvvələri cəlb olunub.

***

Fövqəladə Hallar Nazirliyinin (FHN) məlumatına görə, yanğın genişlənməsinə imkan verilmədən FHN-in qüvvələri tərəfindən qısa müddətdə söndürülüb.

***

FHN-in Mətbuat xidmətinin məlumatına görə, Abşeron rayonu, Məmmədli kəndində yanacaqdoldurma məntəqəsinin ərazisində yanğın olub.

Əraziyə FHN-in Dövlət Yanğından Mühafizə Xidmətinin qüvvələri cəlb edilib.

Hadisə yerində əməliyyat şəraitinin qiymətləndirilməsi zamanı yanğının məntəqənin ərazisində yerləşən bir dam altında tikilmiş ümumi sahəsi 260kv.m. olan 8 boksdan ibarət avtomobil təmiri sexi və ehtiyat hissələri satışı mağazası kimi fəaliyyət göstərən obyektlərdə baş verdiyi və yayılma riskinin yüksək olduğu müəyyən olunub.

Yanğınsöndürənlərin çevik müdaxiləsi sayəsində yanğın genişlənərək digər bokslara yayılmasına, habelə yanacaqdoldurma məntəqəsinə keçməsinə imkan verilmədən qısa müddətdə söndürülüb.

Yanğın nəticəsində iki boksun yanar konstruksiyaları 60kv.m. sahədə və dam örtüyünün taxta atmaları 260kv.m. sahədə  yanıb.

Xəsarət alan olmayıb.

Digər obyektlər və yanacaqdoldurma məntəqəsi yanğından mühafizə olunub.