Yardım aparan yük karvanı talan edildi

Qəzzaya aparılan 100-dən çox n BMT-nin yardım maşınına hücum olub.

Avtosfer.az xəbər verir ki, basqınçılar ərzaq maşınlarını talan ediblər. Nəticədə Qəzza zolağında ərzağın qiyməti kəskin bahalaşıb. Birləşmiş Millətlər Təşkilatının Yaxın Şərqdəki Fələstinli Qaçqınlara Yardım və İşlər üzrə Agentliyinin (UNRWA)  məlumatına görə, Qəzzanın mərkəzinə daxil olan 109 yük maşınından 97-si talan edilib. Məlumatda bildirilir ki, un qıtlığı səbəbindən Deyr əl-Balah və Xan Yunisdə səkkiz çörək zavodunun hamısı işini dayandırıb: “Təcili müdaxilə olmasa,  qida çatışmazlığı daha da pisləşəcək və humanitar yardımdan asılı olan 2 milyondan çox insanın həyatı təhlükə altına düşəcək”.  Deyr əl-Balah şəhərində bir kisə  unun 100 dollara satıldığı məlum olub.

BMT nümayəndəsi Stefan  Dujarric bildirib ki, yardım Kerem Şalom keçidinə  gətirildikdən sonra 109 yük maşınından ibarət karvana İsrail hərbçiləri alternativ, naməlum marşrutla getməyə məcbur ediblər. Yük maşınları da elə keçidin  yaxınlığında qarət edilib. İsrail yardımı oğurlamaqda  HƏMAS-ı ittiham edir .

Bununla belə, HƏMAS-ın xaricdə məskunlaşan yüksək rütbəli rəsmisi Bassem Naim iddia edib ki, talançılar Rəfahın şərqində İsrail hərbi mövqeləri yaxınlığında fəaliyyət göstərən gənc bədəvilərdir. Yaraqlıların idarə etdiyi Əl-Əqsa televiziyası Qəzzada HƏMAS-ın idarə etdiyi təhlükəsizlik qüvvələrinin talançılara qarşı əməliyyat başlatdığını və onlardan 20-nin öldürüldüyünü iddia edib (konkret.az).