Yarış avtomobili seyrçilərə çırpılıb, ölənlər var - VİDEO

Şri-Lankada keçirilən avtomobil yarışında avtomobilin xətdən çıxaraq seyrçilərə çırpılması nəticəsində 7 nəfər ölüb, 21 nəfər yaralanıb. “Report” xəbər verir ki, bu barədə Şri-Lankanın “Newsfirst” portalı məlumat yayıb. Qəza adada keçmiş hərbi qarnizonun ərazisində keçirilən “Fox Hill Super Cross” yarışında baş verib. Yarışlar yerli əhali arasında populyardır. Bu il yarışı izləməyə 100 mindən çox insan gəlib.

Polisin məlumatına görə, yarışda iştirak edən avtomobillərdən biri idarəetmədən çıxaraq seyrçilərə çırpılıb. Ölənlər arasında uşaqlar da var.

Zərərçəkənlər xəstəxanalara çatdırılıb. Onlardan dördünün vəziyyəti ağır qiymətləndirilir.