Yaxın Şərqdə GƏRGİNLİK: Oman İrana etiraz notası verdi

Oman xarici işlər nazirinin müavini Xalid bin Həşəl əl-Müsəlhi İranın Məsqətdəki səfiri Musa Fərhangı çağıraraq, Oman ərazisinə pilotsuz uçuş aparatları (PUA) ilə edilən hücumlarla bağlı ona etiraz notası təqdim edib.

Avtosfer.az TASS-a istinadən xəbər verir ki, bu barədə sultanlığın Xarici İşlər Nazirliyinin bəyanatında bildirilir.

Mətndə qeyd olunur ki, diplomatın çağırılmasına Musandam və Əl-Vusta əyalətlərindəki obyektlərə dronlarla endirilən zərbələr səbəb olub. Görüş zamanı əl-Müsəlhi Məsqətin "bu məsuliyyətsiz hərəkətlərdən" ciddi narazılığını ifadə edib. Nazir müavini dövlət suverenliyinə, mehriban qonşuluq münasibətlərinə və daxili işlərə qarışmamaq prinsiplərinə riayət etməyin, habelə iki qonşu ölkəni və xalqlarını bağlayan norma və mənəvi dəyərlərə hörmətlə yanaşmağın vacibliyini vurğulayıb.

Qeyd edək ki, iyulun 12-də Bəhreyn, Qətər, Küveyt, BƏƏ və Omanda raket və pilotsuz uçuş aparatlarından istifadə olunmaqla hava hücumları qeydə alınıb.