Bu maşınlarda “Apple Car Key” sistemi yaradılır - “Toyota”dan YENİLİK

Avtomobil açarlarını daim üzərində gəzdirmək artıq tədricən keçmişdə qalır. Dünyanın ən böyük avtomobil istehsalçılarından biri olan "Toyota" "Apple" ın “Avtomobil Açarı” (“Apple Car Key”) xüsusiyyətini dəstəkləyən istehsalçılar sırasına qoşulmağa hazırlaşır.

Avtosfer.az xəbər verir ki, yayımlanan son hesabatlara əsasən, "Toyota Apple Car Key" funksiyasını öz avtomobillərinə inteqrasiya edəcək. Bu texnologiya sürücülərə fiziki açardan istifadə etmədən, "iPhone" və ya "Apple Watch" vasitəsilə avtomobillərini kilidləməyə, kilidini açmağa və mühərriki işə salmağa imkan verir.

Hazırda nə "Toyota" , nə də “Apple” bu məsələ ilə bağlı rəsmi açıqlama yayıb. Bu səbəbdən "Apple Car Key" dəstəyinin “Toyota” avtomobillərində nə vaxt aktivləşdiriləcəyi ilə bağlı dəqiq tarix mövcud deyil. Eyni zamanda, hansı modellərin bu yeniliyi dəstəkləyəcəyi də hələlik açıqlanmayıb. Məlumatlara görə, funksiyanın mövcud modellərə proqram təminatı yeniləməsi ilə əlavə edilə biləcəyi ehtimal olunsa da, bəzi mənbələr "Toyota"nın bu texnologiyanı yalnız yeni istehsal ediləcək avtomobillərdə tətbiq edə biləcəyini istisna etmir.

"Apple Car Key" texnologiyası “Apple”ın “Wallet” tətbiqi üzərindən işləyir və əsas məqsədi avtomobil sahiblərinin fiziki açara olan ehtiyacını minimuma endirməkdir. Funksiyanın işləmə prinsipi və imkanları avtomobilin modelindən və texniki xüsusiyyətlərindən asılı olaraq dəyişə bilər. Ümumilikdə isə sistem avtomobilə yaxınlaşdıqda qapıların avtomatik açılması, avtomobilə mindikdən sonra mühərrikin işə salınması və sürücü avtomobildən uzaqlaşdıqda qapıların yenidən kilidlənməsi imkanlarını təqdim edir. Bəzi modellərdə isə cihazı qapı dəstəyinə və ya xüsusi oxuyucuya yaxınlaşdırmaq kifayət edir. Eyni zamanda, müəyyən nəqliyyat vasitələrində avtomobilin uzaqdan kilidlənməsi və ya kilidinin açılması kimi funksiyalar da dəstəklənə bilər.

Qeyd edək ki, "Apple Car Key" artıq bir sıra premium və orta seqment avtomobil markalarında tətbiq olunur. "Toyota" nın da bu siyahıya qoşulması, ağıllı texnologiyaların kütləvi avtomobil bazarında daha geniş yayılacağının göstəricisi kimi qiymətləndirilir. Bu yenilik, xüsusilə gündəlik istifadə rahatlığı və təhlükəsizlik baxımından sürücülər üçün əlavə üstünlüklər vəd edir.

Eltac