“Coca-cola” məhsulları geri çağırıldı – TƏRKİBİNDƏ BU MADDƏ VAR İMİŞ

Bəzi ölkələrdə tanınmış markalara aid içkilərin tərkibində həddindən artıq xlorat olması şübhəsilə geri çağırılmasına qərar verilib.

Avtosfer.az-ın məlumatına görə, Belçika Federal Qida Zəncirinin Təhlükəsizliyi Agentliyi (FASFC), “Coca-Cola” “Europacific Partners Belgium” tərəfindən istehsal edilən müxtəlif məhsulların qüsurlu məhsul olduğunu açıqlayıb.

Belə ki, “Coca-Cola”, “Fanta”, “Sprite”, “Fuse Tea”, “Nalu”, “Minute Maid”, “Tropico və Royal Bliss” markalarına aid məhsulların tərkibində müəyyən edilmiş normadan daha yüksək xlorat olmasını əsas gətirərək həmin məhsulların ümumilikdə toplanması və geri çağırılmasının mütləq olduğu vurğulanıb.

Məlumata əsasən, istehsal kodları 328 GE-dən 338 GE-yə qədər olan bu məhsulların qutu və şüşə butulkalarda satıldığı bildirilib. İstehlakçılara həmin məhsulları istehlak etməmək tövsiyə edilib və satış nöqtələrinə qaytarılması üçün xəbərdarlıq edilib.

Belçika mətbuatının yazdığına görə, geri çağırılan məhsullar Belçikanın Gent şəhərindəki müəssisədə istehsal olunub və bu məhsullar Belçika ilə yanaşı Hollandiya, İngiltərə, Almaniya, Fransa və Lüksemburqa da ixrac edilib.

Qeyd edək ki, xlorat suyun təmizlənməsində və qida emalında xlor əsaslı dezinfeksiyaedici maddələrdən istifadə zamanı əmələ gəlir.

Eltac Zülfüqaroğlu