Hicablı qadınlar təyyarədən düşürüldü

Bostondan Los-Ancelesə getmək istəyən 2 müsəlman hicablı qadın təyyarədən düşürülüb. Buna səbəb stüardessanın müsəlman qadınların ona “çox diqqətlə baxdığını” düşünməsi olub. Hadisə Los-Anceles hava limanında baş verib. Baş verənləri həmin reyslə uçan amerikalı jurnalist Mark Fronfelder lentə ala bilib. Daha sonra o bu görüntüləri “YouTube”a yerləşdirib. Jurnalistin sözlərinə görə, hadisəyə səbəb olan stüardessa qorxmuş və ya narahat olmuş deyil, əksinə, əməlindən razı görünüb. Jurnalist hadisəni absurd və gərəksiz adlandırıb. “JetBlue” avia şirkətindən bildirilib ki, müsəlmanlar sadəcə dini mənsubiyyətinə görə saxlanılmayıblar. Şirkət nümayəndəsinin sözlərinə görə, hadisə bütün təhlükəsizlik prosedurlarına riayət edilməsi zəruriliyi səbəbindən baş verib. Məlumata görə, müsəlman qadınlar polislə qısa söhbətdən sonra azad ediliblər.