İlk dərs günündə antiekologiya - VİDEO

Bu səhnə hamıya tanışdır: məktəblərdə ilk dərs günü birincilər çoxlu şar gətirir və “təntənəli mərasimdən sonra” şarlar havaya buraxılır. Bu gün də istisna olmadı. 

Bu foto və videodan da görünür ki, birinci sinifə qədəm qoyanlar yüzlərlə şarı Bakı küləyinə həvalə ediblər. Külək də onları şəhərin müxtəlif yerlərinə daşıyır. İlk baxışdan belə sual doğur: burda qeyri-adi nə var? 

Əslində sadə görünən bu iş reallıqda ekologiyaya zidd addımdır. Bakıda onlarla məktəbdən buraxılan minlərlə şar bir müddət Bakı səmasında dövr etdikdən sonra yerə düşür.

Nəticədə plastik məmulatlarla çirklənmə yaranır.

İşin digər tərəfi: orta məktəbə ilk addımını təbiətə ziyan vuraraq atan şagird gələcəkdə təbiəti sevəcəkmi?

Bu məsələdə 6 yaşlı körpələr heç bir halda təqsirkar deyillər. Sadəcə olaraq, valideyn komitələrinin və məktəb rəhbərlərinin Şərqə məxsus lüzumsuz təmtəraq hissi (qonşudan dala qalma prinsipi) ilk baxışdan xırda görünən ekeoloji problemin miqyasının böyüməsinə səbəb olur. 

Görəsən dərs ilinin açılışını bu cür təmtəraqla qeyd etməyən Avropa məktəbləri bizdən geridə qalıblar?

Vüqar Yaşaroğlu