Kişilər qadınlardan daha tez və daha çox kökəlir? – İNGİLİS ALİMLƏR SƏBƏBLƏRİ AÇIQLADI

Müxtəlif ölkələrdən toplanan məlumatlar göstərir ki, kişilərlə qadınlar arasındakı boy və çəki fərqləri 1900-cü ildən bəri əhəmiyyətli dərəcədə artıb.

Avtosfer.az xəbər verir ki, Roehempton Universitetinin professoru Levis Helsi və həmkarları tərəfindən aparılan tədqiqat bu fərqin səbəblərini araşdırıb. Nəticədə, məlum olub ki, kişilər qadınlardan daha sürətli şəkildə boy və çəki artımı nümayiş etdirir. Həyat şəraitinin yaxşılaşması, qidaya çıxışın artması və xəstəliklərin azalması bu dəyişiklikdə mühüm rol oynayıb.

Ümumdünya Səhiyyə Təşkilatı və Böyük Britaniyanın məlumatlarından istifadə edilən tədqiqatda İnsan İnkişafı İndeksi (İİİ) əsas meyar kimi götürülüb. Araşdırma göstərib ki, İİİ-də hər 0,2 bəndlik artım qadınlarda orta hesabla 1,7 sm boy və 2,7 kq çəki artımına, kişilərdə isə 4 sm boy və 6,5 kq çəki artımına səbəb olub.

Kişilər daha tez boy və çəki artırır: Böyük Britaniya üzrə məlumatlar göstərir ki, 1900-cü illə müqayisədə qadınların orta boyu 159 sm-dən 162 sm-ə (artım 1,9%), kişilərin isə 170 sm-dən 177 sm-ə (artım 4%) yüksəlib. Bu dövrdə kişilərin boy artımı qadınlarla müqayisədə iki dəfə sürətli olub.

Halsey bildirib ki, qadınlar kişilərin boyunu və fiziki gücünü qoruyucu xüsusiyyətlər olaraq görürlər. Uzun boylu olmaq təkcə fiziki cazibədarlıq deyil, həm də sağlamlıq və sərt ətraf mühit şəraitinə davamlılıq göstəricisidir.

Cinsi seçmə və sosial təsirlər – “Biology Letters” jurnalında dərc olunan araşdırma göstərib ki, qadınlar uzun boylu və əzələli kişiləri üstün tuturlar. Bununla belə, artıq çəkinin hər zaman əzələli bədən quruluşuna işarə etmədiyi vurğulanır.

Uzun boyun bəzi mənfi təsirləri də var. Araşdırmaya görə, uzun boylu fərdlər xərçəng riskinə daha çox meylli ola bilərlər, lakin ümumiyyətlə daha yüksək gəlir səviyyəsinə sahib olurlar.

Minnesota Universitetindən Prof. Maykl Vilson kişilərin daha sürətli boy və çəki artımını "cəlbedici" adlandırıb və bunun bioloji fərqlərin təkamül prosesi ilə əlaqəsini göstərdiyini vurğulayıb.

Eltac Zülfüqaroğlu