Maşınlarda sükanın yanındakı “OFF” düyməsi hansı məqamlarda istifadə edilməlidir? - TÖVSİYƏ

Müasir avtomobillərdə texnologiya inkişaf etdikcə, sükan və ön panel üzərindəki düymələrin sayı da artır. Lakin bir çox sürücü nəqliyyat vasitəsindəki bəzi işarə və funksiyaların mənasını tam bilmir. Son günlər sosial şəbəkələrdə bir sürücünün avtomobilindəki “OFF” yazılı naməlum düymə ilə bağlı paylaşımı bu mövzunu yenidən gündəmə gətirib.

Avtosfer.az xəbər verir ki, üzərində “OFF” yazısı və altında dalğalı xətlər olan düymənin fotosu internet forumlarında sürətlə yayılıb. Paylaşım edən sürücü bildirib ki, istifadəçi təlimatında da bu düymə barədə aydın məlumat tapa bilməyib. Düymənin fara tənzimləmə hissəsinin yaxınlığında yerləşməsi isə çaşqınlığı daha da artırıb.

Mütəxəssislər isə bildirirlər ki, sözügedən düymə əksər hallarda avtomobilin köməkçi təhlükəsizlik və ya qənaət sistemlərindən birini deaktiv etmək üçün nəzərdə tutulur. Bu simvol adətən iki funksiyadan birini ifadə edir: yanacağa qənaət edən avtomatik “Start-Stop” (işəsalma) sistemi və ya “ESP” (Elektron Sabitlik Proqramı).

Qeyd olunur ki, müasir avtomobillərin böyük əksəriyyətində bu sistemlər mühərrik işə düşən kimi avtomatik aktivləşir. “OFF” düyməsinə basıldıqda isə cihaz panelində narıncı rəngli xəbərdarlıq işığı yanır və sistemin müvəqqəti olaraq söndürüldüyünü göstərir.

Məsələn, bəzi modellərdə, o cümlədən “Nissan Qashqai”də “Start-Stop” sisteminin deaktiv edilməsi üçün düymə bu formada yerləşdirilir. “BMW 3” Seriyası kimi daha idman yönümlü modellərdə isə oxşar görünüşlü düymə ESP sistemini söndürmək üçün nəzərdə tutulur.

Təhlükəsizlik üzrə mütəxəssislər xəbərdarlıq edirlər ki, xüsusilə ESP sisteminin hərəkət zamanı söndürülməsi risklidir. Bu sistem avtomobilin sürüşməsinin və idarəetmənin itirilməsinin qarşısını almaq üçün nəzərdə tutulub və qəza riskini azaldır.

Bununla belə, müəyyən hallarda ESP-nin müvəqqəti deaktiv edilməsi zəruri ola bilər. Məsələn, avtomobil palçıqda, qarda və ya qumda ilişib qaldıqda təkərlərin sərbəst fırlanmasına ehtiyac yaranır. ESP aktiv olduqda sistem təkərin boş fırlandığını aşkarlayaraq mühərrik gücünü azalda bilər ki, bu da avtomobilin çətin vəziyyətdən çıxmasını çətinləşdirir. Belə hallarda “OFF” düyməsinin basılması təkərlərin daha sərbəst hərəkətinə imkan yaradır.

Mütəxəssislər sürücülərə avtomobillərindəki bütün düymə və işarələrin funksiyalarını öyrənmək üçün istifadəçi təlimat kitabçasını diqqətlə oxumağı və naməlum sistemləri hərəkət zamanı sınaqdan keçirməməyi tövsiyə edirlər.

Eltac Zülüfqaroğlu