"Aeroflot" bəzi reysləri ləğv edəcək - YENİLƏNİB

Rusiyanın "Aeroflot" aviaşirkətinin informasiya sistemində yaranmış nasazlığa görə məsuliyyəti "Silent Crow" və "Cyberpartisans" haker qrupları öz üzərinə götürüb.

Avtosfer.az bu barədə "Kommersant" nəşrinə istinadən məlumat yayıb.

Hakerlər bir il ərzində "Aeroflot"un "korporativ şəbəkəsində" olduqlarını bildiriblər.

Nəticədə 7 000-ə yaxın həm fiziki, həm də virtual serverin məhv edildiyi iddia edilir.

Hakerlər uçuş tarixçəsi məlumat bazalarını əldə etdiklərini, bütün kritik korporativ sistemləri ələ keçirdiklərini, idarəetmə də daxil olmaqla işçilərin şəxsi kompüterlərinə nəzarəti ələ keçirdiklərini, dinləmə serverlərindən və kadrların müşahidə və nəzarət sistemlərindən məlumatların kopyalandığını bildiriblər.

Artıq haker hücumundan sonra "Aeroflot" aviaşirkətinin informasiya sistemində yaranmış nasazlıqla bağlı kompüter məlumatlarına qeyri-qanuni girişlə bağlı cinayət işi açılıb.

Bu barədə Rusiya Baş Prokurorluğunun mətbuat xidməti məlumat yayıb.

Məlumatda qeyd olunur ki, prokurorluq orqanının yoxlaması əsasında Rusiya Federasiyası Cinayət Məcəlləsinin 272-ci maddəsinin dördüncü hissəsi (kompüter məlumatlarına icazəsiz daxil olma) ilə cinayət işi açılıb.

***11:18

Rusiyanın milli aviadaşıyıcısı "Aeroflot" aviaşirkətin informasiya sistemlərində nasazlıq səbəbindən reyslərin cədvəlində məcburi düzəlişlər ediləcəyi barədə xəbərdarlıq edib.

Bu barədə Avtosfer.az "Aeroflot"un teleqramdakı məlumatına istinadən xəbər verir.

"Aviaşirkətin informasiya sistemlərinin işində nasazlıq baş verib. Xidmətlərin işində fasilələr ola bilər. Bununla əlaqədar olaraq, həyata keçirilən reyslərin cədvəlində məcburi düzəlişlər gözlənilir", - məlumatda bildirib.

Bildirilir ki, şirkət xidmətlərin normal işinin tezliklə bərpası üzərində işləyir.