Çovdar-Çaykənd yolunda aparılan əsaslı təmir davam etdirilir - FOTO - VİDEO

Hazırda təmir işləri yolun 1-ci kilometrliyində, həmçinin 5-ci kilometrdən 15-ci kilometrədək olan hissələrində aparılır. Sözügedən hissələrdə mövcud asfalt örtüyünün yararsız vəziyyətdə olması gediş-gəlişdə çətinliklər yaradırdı. Yolun IV texniki dərəcəyə uyğun şəkildə yenidən qurulması ilə bu problemlər aradan qaldırılır.

Avtosfer.az xəbər verir ki, layihə çərçivəsində yolboyu torpaq işləri, yol yatağı və yol əsasının inşası, zəruri yerlərdə müxtəlif diametrli suötürücü boruların quraşdırılması, eləcə də yeni asfalt-beton örtüyünün döşənməsi işləri artıq yekunlaşıb.

Torpaq yatağının genişləndirilməsi məqsədilə qaya tipli süxurların mexanizmlə kəsilməsi işləri də yerinə yetirilib. Hazırda layihə üzrə beton küvetlərin inşası davam etdirilir.

Bütün işlər “İnşaat Norma və Qaydaları”na uyğun şəkildə, texnoloji ardıcıllıq gözlənilməklə icra olunur. Tikinti işlərinin vaxtında başa çatdırılması üçün əraziyə kifayət qədər işçi qüvvəsi və texnika cəlb edilib.

Tikintinin son mərhələsində yol nişanları və məlumatverici lövhələrin, siqnal dirəklərinin quraşdırılması, həmçinin yolun üfüqi nişanlanma xətlərinin çəkilməsi işləri həyata keçiriləcək.

Çovdar–Çaykənd avtomobil yolunun yenidən qurulması nəticəsində bölgə sakinlərinin gediş-gəlişi xeyli rahatlaşacaq, yük və sərnişin daşımaları daha təhlükəsiz və sürətli şəkildə təmin olunacaq.