DİN əməkdaşları Qusar rayonunda şagirdlərlə görüşlər keçirib - FOTO

Daxili İşlər Nazirliyinin əməkdaşları mütəmadi olaraq ölkənin bütün şəhər və rayonlarında orta məktəb şagirdləri ilə vətənpərvərlik mövzusunda təhsilə təşviqlə bağlı  görüşlər keçirirlər. Bu tipli görüşlər 12-13 oktyabr tarixlərində Qusar rayonunun mərkəzindəki və kəndlərdəki məktəblərin IX-X-XI sinif şagirdləri ilə  keçirilib. Keçirilən görüşlərdə DİN-in Polis Akademiyasının Beynəlxalq əməkdaşlıq bölməsinin rəisi, polis polkovnik-leytenantı Elçin Orucov və Qusar Rayon Polis Şöbəsinin rəisinin şəxsi heyət üzrə köməkçisi Mövlud Əliyev və digər əməkdaşları iştirak ediblər. 
Qusar rayon 6 nömrəli məktəbində təşkil olunan görüşdə rayon mərkəzində yerləşən  məktəblərin şagirdlərinin, eləcə də Yuxarı Zeyxur, Hil,  Urva, Çiləgir və digər ətraf kənd  məktəblərinin qarşısında çıxış edən polis əməkdaşları  onlara  sağlam həyat tərzinin təbliği, eləcə də onlarda vətənpərvərlik hissinin daha da yüksəldilməsi, xalqımızın tarixi keçmişi, ölkəmizdə yaradılan sabitlik, asayiş barədə danışıblar. Daxili İşlər Nazirliyi sistemində təhsilə təşviq edilmə polis və Polis Akademiyasının tarixi, daxili işlər orqanlarında xidmətin şərəfliliyi mövzusunda  yeniyetmə və gənclərimizlə söhbətlər aparılıb.

Keçirilən tədbirlərdə çıxış edən Elçin Orucov şagirdləri salamlayıb və onlara gələcək həyatlarında uğurlar arzulayıb. Tədbir iştirakçılarına Polis Akademiyasının fəaliyyətini özündə əks etdirən qısa metrajlı tanıtım videoçarxı göstərilmiş, akademiyaya dair lifletlər (məlumat vərəqələri) paylanmışdır. Daha sonra ali təhsil almaq arzusunda olan abituriyentlərə Polis Akademiyası barədə ətraflı məlumat verib, qocaman təhsil müəssisəsinin ölkəmizdə savadlı kadrların yetişməsində, daxili işlər orqanlarının hüquqşünaslarla təmin olunmasında mühüm rol oynadığını diqqətə çatdırıb. Akademiyaya kursant qəbulu qaydaları ilə bağlı abituriyentlərin suallarını cavablandıran polis polkovnik-leytenantı orada gənclərimizin hərtərəfli inkişafı üçün yaradılan müasir şərait, zəngin kitabxanalar, xarici dil kursları, laboratoriyalar, yataqxanalar, idman və atıcılıq yerləri, habelə asudə vaxtlarının səmərəli təşkili məqsədilə görülən işlərdən danışıb.
Keçirilən görüşlərin sonunda şagirdlərin sualları cavablandırılıb