Bu avtobusların zolağa daxil olması qadağandır - CƏRİMƏSİ VAR - VİDEO

Bakıda avtobus zolaqlarının təşkili günü-gündən artmaqda davam edir. Sonuncu dəfə avtobus zolağı Bakı-Sumqayıt yolunda təşkil edilib. Çox təəssüf hissi ilə bildiririk ki, həmin zolaqlara marşrut avtobusları ilə yanaşı, digər avtomobillər də daxil olur. Eyni zamanda marşrut xəttində fəaliyyət göstərməyən avtobusların da həmin zolaqla hərəkət etməsinin şahidi oluruq. Təqdim etdiyimiz videoda da aydın şəkildə görünür ki, Mikayıl Useynov küçəsindəki avtobus zolağında şirkətlərə və özəl təşkilatlara aid avtobusların hərəkət etməsi əks olunub.

Digər avtobusların həmin zolağa daxil olması qayda pozuntusu hesab olunur, yoxsa yox?

"Yol hərəkəti haqqında" qanunda ümumi istifadədə olan nəqliyyat vasitəsinin anlayışı verilib: Sərnişin daşınması üçün nəzərdə tutulmuş, müəyyən edilmiş marşrut üzrə təyin edilmiş dayanacaqlarla hərəkət edən nəqliyyat vasitəsi (avtobus, trolleybus, tramvay) ümumi istifadədə olan nəqliyyat vasitəsi hesab olunur.

Anlayışdan göründüyü kimi, sərnişinlərin daşınması üçün nəzərdə tutulan istənilən nəqliyyat vasitəsi yox, yalnız konkret müəyyən edilmiş marşrut üzrə, müəyyən edilmiş dayanacaqlarla hərəkət edən avtobuslar ümumi istifadədə olan nəqliyyat vasitəsi hesab edilir. Deməli, marşrut taksiləri və adi minik taksiləri, ayrı-ayrı təşkilatlara xidmət edən avtobuslar, habelə qeyri-müntəzəm (sifarişlə) sərnişin daşıyan avtobuslar ümumi istifadədə olan nəqliyyat vasitələri sırasına aid deyildir.

Ümumi istifadədə olan nəqliyyat vasitəsi həm şəhərdaxili, həm də beynalxalq və şəhərlərarası sərnişin daşımalarını həyata keçirir.

Qanunun hərfi mənasına görə, şirkət və özəl təşkilatlara aid, o cümlədən sifarişlə fəaliyyət göstərən avtobus sürücülərinin həmin zolağa daxil olması qadağandır. Bu hərəkətə yol verən sürücülər 40 manat məbləğində cərimə edilə bilər.

Nərmin