Bu yüklər təhlükəlidir, amma daşınmasına icazə lazım deyil - VİDEO

Son vaxtlar bəzi yük avtomobillərinin sürücüləri daşıdıqları yükə görə yol polisi tərəfindən saxlanıldıqlarını bildirirlər. Belə sürücülərdən biri redaksiyamızın qaynar xəttinə məlumat verərək bildirib ki, qablaşdırılmış şəkildə avtomobil yağlarını daşıdığı zaman yol polisi tərəfindən saxlanılıb. Polis əməkdaşı bunun təhlükəli yük olduğunu bildirərək sürücüyə irad bildirib.

Hansı yüklərin  təhlükəli yük hesab olunması ilə bağlı Avtosfer.az araşdırma aparıb.

Belə ki, Nazirlər Kabinetinin 10 saylı qərarı təhlükəli yüklərin daşınması ilə bağlı normaları tənzimləyir. Həmin qərarda avtomobil yağlarının da təhlükəli yük olduğu qeyd edilib. Lakin ən az təhlükəli yük hesab olunur. Buna baxmayaraq qərarda bir incəlik də var. Sözügedən qərarda göstərilib ki, təhlükəlilik dərəcəsi aşağı olan yükləri (məişət qazı, yanacaq,  avtomobil yağı) xüsusi qablaşdırılmış vəziyyətdə daşımaq, təhlükəli yükləri daşımaq qaydaları ilə tənzimlənmir. Məsələn, avtomobilin yük yerində 1-2 qaz balonu, 1 kanistr və ya 1 çəllək yanacaq və ya qablaşdırılmış avtomobil yağı daşımaq qadağan deyil. Yağlar qablaşdırılmış şəkildə olduqda onların daşınması təhlükəli yük daşıma qaydalarına aid deyil. Məsələn, “Ford” markalı yük avtomobilində qablaşdırılmış mühərrik yağlarının tam yüklü vəziyyətdə daşınması qanunvericiliyə zidd deyil. Bu, təhlükəli yüklərin daşınması qaydası ilə tənzimlənmir. Çünki Nazirlər Kabinetinin həmin qərarında qeyd edilib ki, mühərrik yağları qablaşdırılmış şəkildədirsə təhlükəli yük hesab edilmir. Buna görə də  sertifikat və ya xüsusi icazəyə heç bir ehtiyac yoxdur.

Nərmin