Ehtiyat hissələrinin yüngülləşdirilməsi avtomobilin sürət və çevikliyinə necə təsir edir? – AVTOMOBİL USTASI

Yeni nəsil avtomobil detalları istehsalçıların bir çox modellərdə yanacaq səmərəliliyini artırmaq, sürətlənməni optimallaşdırmaq və avtomobilin çevikliyini təmin etmək məqsədilə yüngülləşdirilir.

Lakin bəzi sürücülər və ekspertlər bu dəyişikliklərin avtomobilin təhlükəsizliyinə və uzunmüddətli dayanıqlığına təsir edə biləcəyini düşünür. Xüsusilə kapot, qapı və digər xarici elementlərin daha yüngül olması qəzalar zamanı qoruma səviyyəsini azalda bilər.

Bununla belə, müasir texnologiyalar, hava yastıqları və struktur dəstəklər bu fərqləri kompensasiya edir.

Bəs belə yüngülləşdirilmiş detallar avtomobilin təhlükəsizlik və keyfiyyət göstəricilərinə ciddi təsir göstərə bilərmi?

Mövzu ilə bağlı avtomobil ustası Dəniz Ağabəyli Avtosfer.az-a açıqlamasında bildirib ki, avtomobillərin bəzi detallarının çəkisinin az olması ilə bağlı çoxlu şikayətlər var:

“Daha çox bu məsələ sosial şəbəkələrdə paylaşılır; misal üçün, 2024-2025-ci il model avtomobillərin bəzi detalları əvvəlki illərin modellərinə nisbətən yüngüldür.
İndiki model avtomobillərin, istər Almaniya, istər Amerika, istər Çin, istərsə də digər markalar olsun, yeni nəsil avtomobillərin hər birinin detalları əvvəlki illərin avtomobillərinə görə həm çəkidən daha azdır, həm də detalın qalınlığına bir o qədər diqqət yetirilməyib. Daha çox avtomobilin içərisində hava yastıqları təhlükəsizliyi artırır, lakin kırlalar, kapotlar, qapılar kimi xarici elementlərin ağırlığı əvvəlki modellərlə müqayisədə fərqlidir. Bu fərq yarıya qədər ola bilər.

Avtomobillərin ümumi çəkisində isə fərq çox böyük deyil, təxminən 300-500 kiloqram arasında dəyişir. Bununla belə, avtomobillərin keyfiyyətinə ciddi təsir etmir”. 
Usta əlavə olaraq qeyd edib ki, alt işlək hissələr, həmçinin plug-in hibrid modellərdəki batareyalar avtomobilin balansını təmin edir:

“Batareyalar əvvəlcə metal olan hissələrin yerini tutaraq çəkini tənzimləyir və bu, avtomobilin daha sürətli sürətlənməsinə, yanacaq sərfiyyatının azalmasına və çevikliyin artmasına kömək edir.

Yəni, yeni nəsil avtomobillərin hər birində bu çəki azlığı müşahidə olunur. Lakin avtomobilin təhlükəsizliyi baxımından, yeni nəsil modellərdə əvvəlkilər qədər metalın qalınlığı ilə qorunma təmin olunmur”.

Eltac Zülfüqaroğlu