Prospektdəki bu döngədə diqqətli olun; qəza riski var – XƏBƏRDARLIQ - VİDEO

Yol hərəkətində bəzən sadə görünən vəziyyətlər yeni sürücülər üçün təhlükəli “tələ”yə çevrilə bilir. 

Avtosfer.az xəbər verir ki, qəza əleyhinə kursların məşqçisi Aqil Rəhimov paylaşdığı videoda məhz belə bir situasiyaya diqqət çəkib.

Məşqçinin sözlərinə görə, bu kimi hallar xüsusilə sağa dönmə yerlərində baş verir:

“Adətən bu tələ sağa dönmə yerlərində olur. Stop nişanı var, soldan çoxlu maşın gəlir, biz isə sağa dönməliyik. Yeni sürücülər bu situasiyada çox çətinlik çəkirlər. Videoda da göründüyü kimi, digər avtomobil rahat dönür, amma biz getsəydik, solumuzdakı maşın bizi vura bilərdi. Çünki o, bizi görmürdü. Bu səbəbdən çox ehtiyatlı olmaq lazımdır – bu, yeni başlayanlar üçün tipik ‘tələ’dir.”

Aqil Rəhimov əlavə edib ki, oxşar vəziyyətlər paytaxtın əsas prospektlərində də tez-tez baş verir:

“Heydər Əliyev prospekti ilə aşağı düşəndə sürücülər iki zolağı tutur və sonra sol zolağa keçməyə çalışırlar. Dönmə işıqlarını yandırsalar belə, bu, digər avtomobillərin hərəkətinə mane olur. Sola dönənlər üçün yol daralır və qəza riski artır.”

Ekspertin sözlərinə görə, belə hallarda diqqət, güzgülərdən düzgün istifadə və dönmə siqnallarının vaxtında verilməsi həyati əhəmiyyət daşıyır:

“Məsələn, sağdan gələn maşını görməsəniz və ehtiyatsız davransanız, zərbə qaçılmazdır. Dönəndən sonra da sağ güzgüyə baxmaq, dönmə işıqlarını yandırmaq və diqqətli olmaq vacibdir. Əks halda, hadisə an məsələsi ola bilər.”

Aqil Rəhimov qeyd edib ki, bu cür vəziyyətlərin izahı və təhlili yeni sürücülər üçün nəzəriyyədən daha vacibdir, çünki bu “xırda detallar” yolda ciddi qəzaların qarşısını ala bilər.

Eltac Zülfüqaroğlu