Sürücülərin və piyadaların gizli düşməni – Diqqətli olun - VİDEO

Bakıda havaların bir neçə gündür sərt keçməsi yollarda bir sıra problemlərin ortaya çıxmasına səbəb olub.

Avtosfer.az xəbər verir ki, xüsusilə nəqliyyat vasitələrinin buzlu yollarda sürüşməsi həm avtomobillərə zərər vurur, həm də piyadaların sağlamlığı təhlükə altına düşür.

Xüsusən səhər saatlarında və gecəyə yaxın havanın soyuması ilə yolların bəzi hissələrində görünməyən buz təbəqələri əmələ gəlir. Bu zaman sürücülərin avtomobili idarə etməsində çətinliklər yaşaması mümkündür.

Sürücülərə tövsiyə olunur ki, bu cür şəraitdə sürəti azaltsınlar və yolun vəziyyətini daha diqqətlə izləsinlər. Avtomobillərin təkərlərinin vəziyyətini yoxlamaq və buzlu yollara uyğun qış təkərindən istifadə etmək də vacibdir. Eyni zamanda, ehtiyatla və daha yavaş hərəkət edərək digər sürücülərlə məsafəni qorumağa çalışın. Nəqliyyat vasitələrinin texniki vəziyyətini daim yaxşı saxlamaq və sürüşkən yollarda möhkəm tutuş əldə etmək üçün xüsusi ehtiyat tədbirləri görmək vacibdir.

Bu barədə Baş Dövlət Yol Polisi İdarəsi də (BDYPİ) sürücülərə müraciət edib. Müraciətdə deyilir ki, müəyyən edilmiş sürət həddinə ciddi riayət etmək, hərəkət zamanı ara məsafəsini düzgün seçmək və təhlükəli manevrlərdən çəkinməklə özlərinin, eləcə də digər hərəkət iştirakçılarının təhlükəsizliyini düşünmək vacibdir.

Eltac Zülfüqaroğlu