Avtobusun qapılarını açıq qoyan sürücü sərnişinlərin həyatını təhlükəyə atdı - VİDEO

Avtobus sürücüsünün törətdiyi qayda pozuntusunun videosu sosial şəbəkədə yayılıb. Avtosfer.az xəbər verir ki, hadisə paytaxt ərazisindəki dayanacaqların birində baş verib.

Belə ki, 184 nömrəli xətt üzrə fəaliyyət göstərən avtobusun sürücüsü sərnişinləri götürdükdən sonra qapıları açıq vəziyyətdə hərəkətə başlayıb. Həmin zaman sərnişinlərin həyatı təhlükə altında qalıb.

Günün pik saatlarında sərnişinlər mənzil başına çatmaq üçün avtobusdan sallanaraq getməyə də razı olurlar. Lakin nə sərnişinlər, nə də buna şərait yaradan sürücülər qapıdan sallanaraq getməyin nə qədər təhlükəli olduğunu anlamırlar. Sərt döngələrdə, sərt tormozlamada və ya qəza zamanı sərnişinlər yıxılaraq həyatlarını itirə bilərlər. Ona görə də sürücülər belə vəziyyətdə qapıların bağlanmasını təmin etməlidirlər.

Qeyd edək ki, İnzibati Xətalar Məcəlləsinin 342.1.1-ci maddəsinə görə, nəqliyyat vasitəsini qapıları bağlanmamış vəziyyətdə yerindən tərpətməyə və ya onun hərəkəti zamanı qapıları açmağa görə 40 manat məbləğində cərimə nəzərdə tutulub.

Fərid