Avtoservislər piyadaların yolunu kəsib, sürücülərə tıxac yaradır: "Haqq veririk..." - VİDEO

Avtoservislərin önündə parklanan avtomobillər hər gün piyada və sürücülər üçün maneə yaradır. Bununla bağlı vətəndaşlar saytımıza müraciət edərək görüntülər göndəriblər.

Avtosfer.az xəbər verir ki, bu hal Keşlə qəsəbəsi, Babək prospektindən Nizami Abdullayev küçəsinə girişdə qeydə alınıb. Belə ki, küçədə yerləşən avtoservislərin önündə, yolun hər iki istiqamətində parklanan avtomobillər həm piyadaların, həm də sürücülərin yolunu kəsir. Hətta iki avtomobil eyni anda üz-üzə gəldikdə biri geriyə gedib digərinə yol verməli olur. Sürücülərlə yanaşı piyadalar da yolun hərəkət hissəsi ilə getməyə məcbur olurlar. Avtoservislər məsələ ilə bağlı bildirirlər ki, buna görə vergi və “haqq” ödəyirlər. Vergi ödəmək mütləqdir. Lakin vətəndaşların haqqı olan yolu bağlamaq üçün “haqq”ı kimə və necə ödəmək olar?

Ümid edirik ki, problem tez bir zamanda öz həllini tapacaq. “Haqq” ödəyən avtoservislərə görə vətəndaşlar yolsuz qalmaz və həyatlarını təhlükəyə atmaz.

Məhəbbət Tərlanoğlu