Avtosfer.az saytı 2 yaşını qeyd etdi - FOTOLAR

2014-cü ilin aprel ayından fəaliyyətə başlayan Avtosfer.az saytı  2 yaşını qeyd edib. Mərasimə millət vəkili Rafael Cəbrayılov, Azərbaycan Mətbuat Şurasının sədri, millət vəkili Əflatun Amaşov, Bakı Şəhər Dövlət Yol Polisi İdarəsinin ictimaiyyətlə əlaqələr bölməsinin rəisi, polkovnik Vaqif Əsədov, Baş Dövlət Yol Polisi İdarəsinin əməkdaşı, polkovnik-leytenant İsa Deystani, Bakı şəhər Baş Polis İdarəsinin əməkdaşı, kapitan Elşad Hacızadə, Sumqayıt Şəhər Dövlət Yol Polisi İdarəsinin bölük komandiri, kapitan Mərdan Əliyev, yol hərəkəti üzrə ekspert Ərşad Hüseynov və başqa qonaqlar qatılıb.

Qonaqlar saytın maarifləndirmə, yol hərəkəti qaydalarının təbliğatı işini yüksək qiymətləndirib, sayt rəhbərliyinə təkliflərini bildiriblər.

Mərasimdə çıxış edən Mətbuat Şurasının sədri Əflatun Amaşov bildirib ki, Avtosfer.az saytı sahəvi sayt olaraq jurnalistika sahəsində öz sözünü deyib və qısa müddətdə populyarlıq qazanıb: "Saytdakı peşəkar yanaşma bizi qane edir. Bugünkü cəmiyyətdə belə saytların olması vacibdir. Yol hərəkəti elə bir sahədir ki, insanların maariflənməsinə həmişə ehtiyac var. Avtosfer.az saytı bu missiyanı layiqincə yerinə yetirir. Saytın kollektivini təbrik edirəm".

Millət vəkili Rafael Cəbrayılov isə bildirib ki, Avtosfer.az saytının yol hərəkəti qaydaları ilə bağlı qanunların təbliğində böyük rolu var: "Bu sayta nə Elməddin Muradlının, nə də Dövlət Yol Polisinin saytıdır. Bu sayt yol polisləri ilə sürücülər arasında bir körpüdür, onların ortaq fikirlərini əks etdirir. Güman edirəm ki, bu saytın fəaliyyəti daha da genişlənəcək və biz Avtosfer.az-a hər cür dəstək verməyə hazırıq".

Bakı şəhər Dövlət Yol Polisi İdarəsinin bölmə rəisi, polkovnik Vaqif Əsədov isə bildirib ki, Avtosfer.az saytı yol hərəkəti təhlükəsizliyi ilə bağlı təbliğat işlərinə yol polisinə daim dəstək olur: "Biz yol polisi olaraq Avtosfer.az saytı ilə daim əməkdaşlıq edirik. Bundan sonra da əməkdaşlığımızın yeni mərhələsi başlayacaq. Düşünürəm ki, sürücülərin maarifləndirilməsində, yol qəzalarının sayının azalmasında, qayda pozanların sayının aşağı düşməsində Avtosfer.az saytının da rolu var. İndiyədək həyata keçirdiyimiz bir çox tədbirlər bundan sonra davam etdiriləcək".

Avtosfer.az saytının eksperti, hüquqşünas Ərşad Hüseynov da bu sahədə görülməli olan işlərdən danışıb və saytın fəaliyyətinə daim dəstək olduğunu deyib. O bildirib ki, bundan sonra da bu istiqamətdə fəaliyyətini davam etdirəcək və bir-birindən maraqlı mövzularla həm sürücülərin, həm də yol polislərinin maariflənməsinə dəstək olacaq.

Tədbirdə çıxış edən Baş Dövlət Yol Polisi İdarəsinin əməkdaşı, polkovnik-leytenant İsa Deystani, Bakı şəhər Baş Polis İdarəsinin əməkdaşı, kapitan Elşad Hacızadə, Sumqayıt şəhər Dövlət Yol Polisi İdarəsinin bölük komandiri Mərdan Əliyev və başqaları da Avtosfer.az saytını təbrik edərək gələcəkdə də cəmiyyət üçün faydalı olan təbliğat işlərində dəstək göstərməyə hazır olduqlarını bildiriblər.

Avtosfer.az saytının baş redaktoru Elməddin Muradlı isə qonaqlara təşəkkür edərək bildirib ki, bu sayt Azərbaycan Respublikası Prezidenti yanında Qeyri-Hökumət Təşkilatlarına Dövlət Dəstəyi Şurasının dəstəyi ilə 2014-cü ilin aprelində yaradılıb. Saytın başlıca məqsədi sürücülərin, piyadaların, bütün yol hərəkəti iştirakçılarının maarifləndirilməsi və onları narahat edən məsələlərin işıqlandırılmasıdır: "Bu gün qarşıya qoyduğumuz məqsədə doğru addımlayırıq. Çoxlu uğurlarımız var. Şuraya təşəkkür edirəm ki, daim bizə dəstək göstərir. Yol polisi ilə sıx əməkdaşlıq edirik. Gördüyümüz hər bir iş sürücülərin və yol polislərinin işini asanlaşdırmağa xidmət edir. Düzdür, bəzən toxunduğumuz məsələlər kimlərisə narahat edir, bəziləri təhqirlə tənqidi səhv salır. Amma ümumumilikdə mən bu sayta olan diqqətdən razıyam. Daxili İşlər Nazirliyinin, Baş Dövlət Yol Polisi İdarəsinin, Bakı şəhər Baş Polis İdarəsinin və Bakı Şəhər Dövlət Yol Polisi İdarəsinin rəhbərliyinə təşəkkür edirəm. Bəzən fikirlər haçalansa da, sonda ortaq məxrəcə gələ bilirik. Əldə olunan nəticələr cəmiyyət üçün faydalıdır və biz də bunu istəyirik. Yol qəzalarının, qayda pozanların, sürücülərə qarşı kobudluq edən yol polisi əməkdaşlarının olmaması bizi daha da sevindirərdi. Lakin təəssüflər olsun ki, bu kimi hallar yenə də baş verir. Ancaq mən xüsusən Daxili İşlər Nazirliyinin rəhbərliyinə təşəkkür edirəm ki, saytda yazılan hər bir məsələyə diqqətlə yanaşırlar və dərhal reaksiya verib həllinə çalışırlar. Bu gün hansısa problemdən yazırıqsa, sabah həmin problemin həllindən də yazırıq. Bu, çox yaxşı nəticədir. DİN rəhbərliyi həmişə qaldırılan məsələlərə həssas yanaşır. Ümid edirəm ki, gələcəkdə də faydalı işlər görüb cəmiyyətimizdəki neqativ halların aradan qalxmasına nail ola biləcəyik".

Saytın əsas yaradıcı heyəti - baş redaktor Elməddin Muradlı, hüquqşünas Ərşad Hüseynov, baş redaktorun köməkçisi Fuad Məmmədov qonaqlara minnətdarlıq edərək, Avtosfer.az-ın bundan sonra da sürücülər üçün faydalı resurs olması üçün əllərindən gələni əsirgəməyəcəklərini bildiriblər.

Dəyərli oxucularımıza bizi bu 2 ildə izlədiklərinə görə təşəkkür edirik! Sizlərlə birlikdə neçə belə illərə!

Avtosfer.az