Bakıda qatarla çörək maşını toqquşub, ölən və yaralanan var - VİDEO

Səhər saatlarında Bakıda baş verən ağır qəzadan geriyə belə görüntülər qalıb. Xəzər rayonunda dəmiryolu keçidində qatarla çörək daşıyan yük maşını toqquşub. Dəhşətli qəza nəticəsində yük avtomobilinin sürücüsü Əkbərağa Məmmədov hadisə yerindəcə dünyasını dəyişib. Fövqəladə Hallar Nazirliyinin əməkdaşları tərəfindən deformasiyaya uğramış avtomobildən sürücünün sıxılmış vəziyyətdə olan meyidi çıxarılıb. Maşında olan digər şəxs Elnur Atakişiyev isə yaralanaraq 3 saylı şəhər klinikasına yerləşdirilib.

Dəmiryolu keçidinə  az qalmış STOP və digər məlumatlandırıcı nişanlar var. Hadisənin dəqiq səbəbləri polis araşdırmasından sonra  bilinəcək.

Qubada da bir nəfərin ölümü ilə nəticələnən yol-nəqliyyat hadisəsi baş verib. Hadisə gecə saatlarında Quba-Xınalıq yolunun 55 km-də qeydə alınıb. Xınalıq kənd sakini, 48 yaşlı məmmədqasım bağırovun idarə etdiyi  avtomobil yoldan çıxaraq dərəyə aşıb. Nəticədə sürücü Məmmədqasım Bağırov aldığı xəsarətdən hadisə yerində ölüb. Kənd sakinləri onun meyitinin dərədən çıxarıblar. İlkin məlumata görə, sürücü avtomobili sərxoş vəziyyətdə idarə edib.