Bakıda “qoçuluq” edən sürücü qəza törətdi: "Vurub çənəni çıxararam" - VİDEO

Paytaxtın Hüseyn Cavid prospektində qayda pozaraq qəza törədən sürücü anbaan kameraya düşüb.

Avtosfer.az-ın məlumatına görə, xoşagəlməz hadisə bir neçə gün əvvəl axşam saatlarında qeydə alınıb. Belə ki, 77-CO-872 dövlət nömrə nişanlı “Mercedes” markalı avtomobilin sürücüsü işıqforda özündən öndə dayanan maşını ötmək üçün zolaqdan yol çiyninə çıxaraq qarşıdakı avtomobili sıxışdırır. Lakin işıqforun yaşıl işığı yandıqdan sonra digər sürücü ona yol vermədən hərəkətinə davam edir. Əsəbiləşən “Mercedes” sürücüsü bu dəfə avtomobilin sol tərəfinə manevr edir və dəfələrlə onu sıxışdıraraq maşınını vurur.

Daha sonra vurduğu maşının qarşısını kəsərək zərərçəkmişə “Maşınımı niyə vurursan?” deyir. Digər sürücü isə “Mən yox, sən mənim maşınımı vurdun. Yaxşı ki, kamera var. Niyə narahat olursan?” cavabını verir. Bu sözlərdən qəzəblənən şəxs “Vurub çənəni çıxararam. Maşınımı sıxa-sıxa gəlirsən” - deyə, ona qarşı nalayiq ifadələr  işlədir. Lakin zərərçəkmiş sürücü sakitliyini qoruyur və aidiyyəti quruma zəng edərək yol-nəqliyyat hadisəsi barədə məlumat verir.

Nərmin