Bakıda sürücüyə yazılan cərimə protokolu fotoşopla düzəldilib? - RƏSMİ AÇIQLAMA - FOTO

Bakıda sürücülərdən biri avtomobili park etdikdən sonra ona cərimə protokolu gəlib. 

Avtosfer.az xəbər verir ki, bu barədə “Baku.ws” avtomobilinə cərimə yazılmış şəxsə istinadən məlumat verir.  Onun sözlərinə görə, ərazidə dayanma-durmanı qadağan edən nişan olmasa da, ona cərimə yazılıb.  Vətəndaş iddia edib ki, cərimə protokolunda görünən nişan isə sonradan ora əlavə edilib.

Şikayətçi qeyd edib ki, cərimə yazıldıqdan sonra ərazidə çəkiliş aparıb və nişan olmamasını görüb. Məsələ ilə bağlı məhkəməyə müraciət etdiyini deyən sürücü cərimənin silinməsini istədiyini bildirib.

Məsələ ilə bağlı Bakı Şəhər DYP İdarəsinin baş inspektoru, polis baş leytenantı Rüstəm Əhmədli bildirdi ki, 20.12.2024-cü il tarixdə sürücü barəsində elektron qaydada protokol tərtib edilən zaman qeyd edilən ərazidə 3.27 yol nişanı mövcud olub:

"Daha sonra aidiyyəti qurum tərəfindən yol nişanı ərazidən götürülüb. Sürücü barəsində tərtib edilən protokolda hər hansı bir yanlışlıq yoxdur".