Bakıda tıxacdan qaçmaq istəyən sürücü polisdən qaça bilmədi - VİDEO

Paytaxtın Nərimanov rayonu, Əlövsət Əbdürrəhimov küçəsində kobud qayda pozan sürücü avtomobilin videoregistratoruna düşüb.

Avtosfer.az-ın məlumatına görə, hadisə fevralın 13-də saat 11:57 radələrində qeydə alınıb.

Videodan göründüyü kimi, sıxlıqdan yayınaraq irəlidə hərəkət etmək istəyən 90-VX-084 dövlət nömrə nişanlı “Seat” markalı avtomobilin sürücüsü əks yola çıxır.

Lakin o, qarşı tərəfdən yol patrul xidməti maşınının yaxınlaşdığını gördüyü üçün qoşa xəttin tələbini pozaraq yenidən öz zolağına qayıdır.

Buna baxmayaraq, yol polisi qayda pozan sürücünü saxlayaraq hadisə yerində inzibati qaydada cərimələyir.

Qeyd edək ki, sıxlıq zamanı üstünlük qazanmaq məqsədilə əks yola çıxmaq yalnız qayda pozuntusu deyil, həm də qarşıdan gələn nəqliyyat vasitələri ilə toqquşma riskini artırır.

Belə hallarda bir neçə dəqiqə vaxt qazanmaq cəhdi həm sürücünün özü, həm də digər hərəkət iştirakçıları üçün ciddi təhlükə yarada bilər.

Nərmin