Bir dəqiqəyə 8 bal 440 manatlıq cərimə: Polisin üzərinə sürdü, avtobusun yolunu kəsdi - VİDEO

Bakıda yol hərəkəti qaydalarını kobud şəkildə pozan sürücünün hərəkətləri kameraya düşüb. Avtosfer.az xəbər verir ki, hadisə noyabrın 17-də, paytaxtın Səbail rayonu, Bayıl qəsəbəsində qeydə alınıb.

Belə ki, Gülbala Əliyev küçəsindən Əhəd Yaqubov küçəsi istiqamətinə hərəkət edən 77-HC-485 qeydiyyat nişanlı "Toyota Prius" markalı avtomobilin sürücüsü əks istiqamətə çıxaraq qarşıdan gələn sürücüyə təhlükə yaradıb. O, bir az qarşıda sıxlığın yarandığını görərək yenidən əks yola çıxıb. Bu zaman qarşıdan gələn Post Patrul Xidməti avtomobilinə təhlükə yaradıb. Bunlar azmış kimi, avtobus dayanacağında geriyə dönərək avtobusun da qarşısını kəsib. Sonra isə piyada keçidinin üzərində dayanaraq qaydaları pozmağa davam edib.

Qeyd edək ki, qanunvericilikdə əks istiqamətə çıxıb axına qarşı hərəkət etməyə görə 4 bal 150 manat, dönmə işıqlarından istifadə etməməyə görə 40 manat, avtobus dayanacağında manevr etməyə görə 40 manat, geriyə dönən zaman qarşıdan gələn avtomobillərə yol verməməyə görə 40 manat, piyada keçidinə 5 metrdən yaxın dayanmağa görə isə 20 manat məbləğində cərimə nəzərdə tutulub.

Fərid