"Bravo"nun sürücüsü keçiddə piyadaların üzərinə sürdü - VİDEO

"Bravo" mağazalar şəbəkəsinə məxsus yük avtomobili sürücüsünün kobud qayda pozuntusu kameraya düşüb. Avtosfer.az xəbər verir ki, hadisə sentyabrın 15-də, Xırdalan şəhəri Mehdi Hüseynzadə küçəsində baş verib.

Belə ki, 99-JP-544 qeydiyyat nişanlı "İsuzu" markalı avtomobilin sürücüsü keçiddə piyadalara yol verməyərək hərəkətinə davam edib. Təhlükəni görən piyadalar dayanaraq ölümdən son anda xilas olublar.

"Yol hərəkəti haqqında" qanunun 54-cü maddəsində qeyd olunub ki, əgər nəqliyyat vasitəsi nizamlanmayan piyada keçidinin qarşısında dayanmışdırsa və ya sürətini azaltmışdırsa, qonşu zolaqlarda hərəkət edən digər nəqliyyat vasitələrinin sürücüləri yalnız dayanmış nəqliyyat vasitəsinin qarşısında piyadaların olmadığını yəqin etdikdən sonra hərəkəti davam etdirə bilərlər.

Bu qaydanın pozulmasına görə, İnzibati Xətalar Məcəlləsinin 330.0-cı maddəsinə görə, 50 manat məbləğində cərimə nəzərdə tutulub.

Fərid