Bu ərazidəki piyada keçidi sürücülər tərəfindən davamlı zəbt olunur - FOTO

Paytaxtın Səbail rayonu Badamdar şosesində dayanma-durma qayda pozan sürücülər görüntülənib.

Bu barədə izləyicilərdən biri Avtosfer.az-a müraciət edərək fotoşəkillər göndərib. Belə ki, 77-AF-234 dövlət nömrə nişanlı “Changan” markalı və “Toyota” markalı avtomobillərin sürücüləri piyada keçidinin üstündə, yaxınlığında maşınlarını park ediblər. Nəticədə ərazidən keçən piyadalar keçiddən istifadə edə bilməyiblər. Şikayətçinin iddiasına görə, demək olar ki,  keçid hər gün sürücülərin şəxsi parkinqinə çevrilib. O, xüsusilə məktəblilərin həmin keçiddən istifadə etdiyini vurğulayaraq xoşagəlməz mənzərənin onların həyatı üçün təhlükə yaratdığını qeyd edib. 

Xatırladaq ki, qanunvericiliyə əsasən, piyadalar üçün nəzərdə tutulmuş keçidlərinin üzərində və ona 5 metr məsafədə dayanmaq qadağandır. Bu xətanı törədən sürücülər İnzibati Xətalar Məcəlləsinin 346.1-ci maddəsinə əsasən 60 manat məbləğində cərimələnə bilərlər.

Nərmin