![Yol hərəkəti qaydalarının pozulması ilə bağlı cinayət və inzibati xəta işləri üzrə nələri bilməliyik?](/upload/news/small/1206132.jpeg)
DYP hərəkətin təşkilindəki problemi həll etdi - FOTOLAR
![DYP hərəkətin təşkilindəki problemi həll etdi - FOTOLAR](/upload/news/7b7b94.jpg)
Təxminən bir ay öncə Yasamal rayonunun "Musabəyov parkı" kimi tanınan ərazisində Əbdürrəhim bəy Haqverdiyev, Mirəli Seyidov və Nazim Hikmət küçələrinin kəsişmələrində hərəkətin təşkilində yenilik edilmişdi. Əvvəllər orada mövcud olan 4.3 “Dairəvi hərəkət” nişanı götürülərək, “ASAN Xidmət” tərəfdən gələn nəqliyyat vasitələrinə üstünlük verilmişdi. Həmin dəyişiklikdən sonra oradakı vəziyyəti nəzərdən keçirən hüquqşünas Ərşad Hüseynov hərəkətin belə təşkilinin qüsurlu olduğunu bildirmişdi. Öz fikirlərini Avtosfer.az saytı ilə ictimailəşdirən hüquqşünas orada hərəkətin daha uğurlu təşkili üçün təkliflərini də vermişdi.
Ötən həftə Baş Dövlət Yol Polisi İdarəsinin Hərəkətin Təşkili Şöbəsinin əməkdaşları göstərilən ərazidə hərəkətin təşkili məsələsinə yenidən baxaraq, oradakı yolayrıclarının müvafiq yol nişanları ilə işarələyiblər. Buna münasibət bildirən Ərşad Hüseynov adıçəkilən şöbənin əməkdaşlarına Avtosfer.az vasitəsilə öz təşəkkürünü bildirib: "Bir neçə gün öncə Yasamal rayonu Musabəyov parkı kimi tanınan yerin ətrafında yol hərəkətinin təşkilində qüsur olduğunu və bunun aradan qaldırılması yollarını göstərmişdim. Baş DYP İdarəsinin Hərəkətin təşkili Şöbəsindən əlaqə saxlayaraq iradlara görə təşəkkür etmiş və qüsurları aradan qaldırmağa söz vermişdilər.
Bu gün baxdım ki, doğrudan da problemi həll ediblər və park ətrafındakı kəsişmələrin hamısını üstünlük nişanları ilə komplektləşdiriblər...
Mən də buna görə onlara təşəkkür edirəm".
Öz növbəmizdə biz də Avtosfer.az saytı olaraq Baş DYP İdarəsinin Hərəkətin Təşkili Şöbəsinin əməkdaşlarına göstərdikləri çevik reaksiyaya görə təşəkkür edirik. Hesab edirik ki, mütəxəssiz – media – dövlət orqanı “üçlüyü” hər zaman belə səmərəli və faydalı fəaliyyət göstərsə, ölkəmizdə mövcud olan xeyli problemləri uğurla həll edə bilərik.
Elməddin