Əks yola çıxıb “sağ-sol” edən “avtoş” sürücü - 10-PV-012 - VİDEO

Avtoxuliqanlığı təbliğ edən daha bir gənc sürücünün görüntüləri sosial şəbəkələrdə geniş yayılıb.
Avtosfer.az-ın məlumatına görə, 10-PV-012 dövlət nömrə nişanlı “Lada” markalı avtomobilin sürücüsü təhlükəli manevrlər edərək qəza riski yaradıb. Belə ki, o, öndəki avtomobili ötərək əks istiqamətli yolla hərəkət edib. Daha sonra yolayırıcına daxil olan sürücü “sağ-sol” edərək “şou” göstərib. Digər görüntüdə də o, qarşı yola çıxaraq sürət həddini aşıb. Bununla kifayətlənməyən “avtoş” sürücü avtomobilin ön hissəsini qaldırıb və bəzi kadrlarda göründüyü kimi, dövlət qeydiyyat nişanı olmadan maşını idarə edib.
Qeyd edək ki, sürücünün törətdiyi qayda pozuntusu İnzibati Xətalar Məcəlləsinin 511.1-ci maddəsilə qiymətləndirilə bilər. Avtomobili dövlət nömrə nişanı olmadan idarə etmək isə İXM-nin 342.7 maddəsinə əsasən, 4 bal və 100 manat cəriməylə nəticələnir.

Nərmin