Geriyədönmə zamanı qəza baş verdi – Bu halda günah kimdədir? - VİDEO

Yolayrıclarında, geriyədönmə yerlərində qəzalar tez-tez baş verir. Səbəblər isə təxminən eynidir – manevr qaydasının pozulması. Çoxlarının hələ də tam başa düşmədiyi manevr qaydası anlayışı nədir? Bəs, sürücü manevri necə etməlidir ki, qəza baş verməsin?

Avtosfer.az bu məqamları sürücülərə real qəza videoları əsasında izah edir.

Bu hadisə bir müddət əvvəl Təbriz küçəsində baş verib. Lakin oxşar hadisələr bu gün də baş verir. Konkret olaraq bu situasiyada “kimdir günahkar” sualına dəqiq cavab vermək mümkündür – qara “Nissan”. Çünki o, geriyədönmə yerində kobud qayda pozuntusuna yol verir. Ən sol zolaqla hərəkət etdiyi halda geriyədönmə yerinə çatarkən qəflətən sağ zolağa manevr edir. Bu zaman dönmə siqnalı da yanmır. Arxadan gələn “Mercedes”in sürücüsü zənn edir ki, “Nissan”ın sürücüsü ona yol vermək üçün sağa keçdi. Ona görə də gəldiyi sürətlə hərəkəti davam etdirir. Bu zaman “Nissan”ın sürücüsü qəflətən sola manevr edərək qəzaya səbəb olur. “Mercedes” “Nissan”la toqquşub avtobusa da dəyir. Sürücüyə xeyli maddi zərər dəyir.

Əslində necə olmalı idi?

“Yol hərəkəti haqqında” qanun deyir ki, sürücü dönəcəyi, yəni manevr edəcəyi istiqamət üzrə əvvəlcədən ən sol və ya ən sağ zolağı tutmalıdır. “Nissan”ın sürücüsü əslində qəzaya qədər düzgün hərəkət edirdi – sola dönəcəyi üçün sol zolaqda idi. Amma qəflədən sağa keçib geriyədönmə manevrini geniş götürmək qərarına gəlir. Bu zaman arxadan gələn nəqliyyat vasitəsinə diqqət etmir və onu çaşdırdığı üçün qəza baş verir.

Qanun əslində, “Nissan” sürücüsünün bu cür manevr etməsini qadağan etmir. Qanunda deyilir ki, sola və geriyədönmə manevrini ən sol zolaqdan etmək çətindirsə, yəni, avtomobilin qabaritindən və ya yol şəraitindən asılı olaraq geriyə dönmək birdəfəyə mümkün deyilsə sürücü ikinci zolaqdan bu manevri edə bilər. Lakin bu manevr digər hərəkət iştirakçıları üçün təhlükəsiz olmalıdır. Yəni, “Nissan”ın sürücüsü arxadan gələn “Mercedes”i buraxandan sonra ikinci zolaqdan sola və ya geriyə dönə bilərdi.

Odur ki, yollarda diqqətli olmaq lazımdır. Manevr edərkən, hərəkətə başlayarkən, dayanarkən, zolaqları dəyişərkən digər hərəkət iştirakçılarına da diqqət etmək lazımdır.

Elməddin Muradlı