Həyat və ölüm arasında xətt - PİYADA KEÇİDİ - FOTO

Artıq uzun müddətdir ki, ölkəmizdə piyadaların “zebra” və yerüstü, yeraltı keçidlərdən istifadəsinin təşviqi istiqamətində müxtəlif tədbirlər keçirilir. Hətta qanunvericilikdə keçiddən keçməyən piyadalarla bağlı cərimə də var. Buna baxmayaraq ölkə vətəndaşları yolu piyadalar üçün nəzərdə tutulmayan hissədən keçərək həm özlərinin, həm də başqalarının həyatını təhlükəyə atmağa davam edir.

Avtosfer.az xəbər verir ki, mövzu ilə bağlı Baş Dövlət Yol Polisi İdarəsinin Hərəkətin təhlükəsizliyinin təbliği və ictimai qurumlarla əlaqə şöbəsinin rəisi, polis polkovnik-leytenantı Rövşən Tağıyev də özünün sosial media hesabında paylaşım edib. Paylaşımda bildirilir:

“Həyatla ölüm arasında incə bir xətt dayanır.

Piyada keçidi – səni qoruyan hüquqi və real sipərdir.

Ondan kənara çıxmaq – özünü təhlükəyə atmaq deməkdir.

Qaydaya əməl et.
Yaşamaq üçün”.

Şöbə rəisinin paylaşdığı fotoda olduğu kimi, bu gün ölkəmizdə yol hərəkəti qaydalarını bilməyən, hətta bilsə də, tələsməsi səbəbilə, yaxud başqa bəhanələrdə magistral yollarda belə dəmir maneələrin, məhəccərlərin üstündən hoppanıb yolu qaçaraq keçənlər var. Belə qəza videoları ilə dəfələrlə rastlaşmışıq. Nəzərə almaq lazımdır ki, kiçik bir səhv həm sizin, həm də başqalarının həyatını dəyişə bilər.

Könül Rauf