Hüquqsuz avtomobil idarə edən şəxs 20 GÜN HƏBS EDİLDİ - VİDEO

Şirvan şəhərində sürücülük hüququ olmadan avtomobil idarə edən şəxsin narkotik maddə istifadəçisi olduğu müəyyən edilib.

Baş Dövlət Yol Polisi İdarəsindən Avtosfer.az-a verilən məlumata görə, Ekoloji nəzarət bölüyünün əməkdaşları tərəfindən saxlanılan “Hyundai” markalı avtomobilin sürücüsü Tahir Abdullayevin nəqliyyat vasitəsini sürücülük vəsiqəsi və etibarnamə olmadan idarə etdiyi aşkarlanıb.

Yoxlama zamanı davranışları şübhə doğuran sürücü tibbi müayinəyə cəlb edilib. Müayinənin nəticələrinə əsasən, onun narkotik maddə qəbul etdiyi təsdiqlənib.

Tahir Abdullayev barəsində inzibati protokol tərtib olunaraq iş məhkəməyə göndərilib. Məhkəmənin qərarı ilə o, 20 gün müddətinə inzibati qaydada həbs edilib.

BDYPİ bir daha sürücülərə müraciət edərək narkotik vasitələrin təsiri altında sükan arxasına əyləşməyin insanların həyat və sağlamlığı üçün ciddi təhlükə yaratdığını vurğulayıb və bu cür hallara qarşı daha sərt tədbirlərin davam etdiriləcəyini bildirib.