İşıq dirəyinə dəyən “BMW” 200 metr sonra dayandı – Sərxoş sürücü polislə dalaşdı - VİDEO

Qəza törədən sürücü ona protokol yazan polis əməkdaşlarına hücum çəkib. Avtosfer.az xəbər verir ki, hadisə Türkiyənin Kayseri şəhərində baş verib. Belə ki, Melikgazi rayonunda S.K. idarə etdiyi 38 AD 729 nömrə nişanlı “BMW” markalı avtomobili işıq dirəyinə çırpıb. Zərbənin təsirindən dirək yerindən qopub və avtomobil 200 metr getdikdən sonra dayanıb. Ətrafdakı insanların çağırışı ilə hadisə yerinə polis və təcili yardım işçiləri göndərilib. 
Polis ərazidə tədbir görüb və ilkin qiymətləndirmələr nəticəsində heç kimin xəsarət almadığı müəyyən edilib. 
Yol polisi əməkdaşları sürücünü alkotesterdən keçirmək istəsələr də o, bundan imtina edib. “Mən sərxoş deyiləm” - deyən S.K. əsəbiləşərək polis əməkdaşlarına hücum çəkib və onları hədələyib.
Polis və vətəndaşlar tərəfindən sakitləşdirilən sürücü daha sonra polis idarəsinə aparılıb. Maşın isə evakuatorla cərimə meydançasına yerləşdirilib. 
Faktla bağlı araşdırma aparılır.

Namiq Musayev