İşıqforun yaşıl işığında qəfil dayanan sürücü qəza şəraiti yaratdı - VİDEO

Paytaxtın Babək prospektində qayda pozan sürücü kameraya düşüb.

Avtosfer.az-ın məlumatına görə, hadisə bir müddət əvvəl səhər saatlarında qeydə alınıb.

Kadrlardan görünür ki, 77-UK-793 dövlət qeydiyyat nişanlı “BMW” markalı avtomobilin sürücüsü işıqforun yaşıl işığında qəfil dayanıb. Sürücü nizamlanan piyada keçidində gözləyən piyadaya yol vermək məqsədilə hərəkəti dayandırıb. Bu zaman arxadan gələn motosiklet sürücüsü gözlənilməz manevrlə üzləşərək qəza şəraiti ilə qarşılaşıb.

Qeyd edək ki, qanunvericiliyə əsasən, nizamlanan piyada keçidində nəqliyyat vasitələri və piyadalar işıqforun tələblərinə əməl etməlidirlər. Piyadalar üçün qadağanedici siqnal yandığı halda sürücü onlara yol vermək üçün hərəkəti dayandırmalı deyil. Əksinə, nəqliyyat vasitələri üçün yaşıl işıq yandıqda sürücü hərəkəti davam etdirməli, qəfil və əsassız dayanma ilə digər hərəkət iştirakçılarına təhlükə yaratmamalıdır.

Bu cür hallarda qəfil dayanma arxadan gələn nəqliyyat vasitələri üçün gözlənilməz vəziyyət yaradır və yol-nəqliyyat hadisəsinin baş vermə riskini artırır.

Nərmin