Kameranın çəkə bilmədiyi yerdə sürücülər avtobus zolağı ilə hərəkət edirlər - VİDEO

Bakı-Sumqayıt yolunda avtobus zolaqlarının istifadəsi ilə bağlı ciddi qayda pozuntuları müşahidə olunur. Xüsusilə günün səhər saatlarında sürücülər vaxt itirməmək üçün avtobus zolağından açıq şəkildə istifadə edirlər.

Bu tip halların daha çox baş verməsi yolun müəyyən bir hissəsindədir ki, burada yerləşən kameralar həmin ərazini tam olaraq fiksasiya edə bilmir. Bu boşluqdan istifadə edən sürücülər avtobus zolağına daxil olaraq müəyyən bir məsafədə irəliləyirlər. Daha sonra əvvəlki zolağa qayıdan zaman digər sürücülərin yolunu kəsərək maneə yaradırlar.

Martın 9-da çəkilmiş videogörüntülərdə bu qayda pozuntularının nümunələri əks olunub.

Belə ki, 99-PR-741 qeydiyyat nişanlı "Skoda" markalı, 77-XM-019 qeydiyyat nişanlı "Chevrolet" markalı və 43-BE-898 qeydiyyat nişanlı "BMW" markalı avtomobilin sürücüləri avtobus zolağında hərəkət etməklə qanunu pozublar. Videoda əlavə olaraq, başqa iki sürücünün də eyni qayda pozuntusuna yol verdiyi aydın şəkildə görünür.

Həmin əraziyə nəzarət kameralarının quraşdırılması ilə bu qayda pozuntularının qarşısını almaq olar.

Fərid