Keçiddə dayanmayan sürücü yolu keçən qadını ölümlə üz-üzə qoydu - VİDEO

Bakıda yol nişanına əhəmiyyət verməyən sürücü piyadanı ölümlə üz-üzə qoyub.

Avtosfer.az xəbər verir ki, hadisə paytaxtın Suraxanı rayonunda baş verib. Belə ki, "Mercedes" markalı avtomobilin sürücüsü keçidə yaxınlaşan zaman sürətini azaltmadan hərəkətinə davam edib. Bu zaman yolu keçən qadının üzərinə sürərək onun həyatına təhlükə yaradıb.

Bu cür hallarına baş verməməsi üçün sürücülər qanunvericiliyin tələblərinə əməl etməlidirlər. "Yol hərəkəti haqqında" qanunun 54-cü maddəsində qeyd olunub ki, əgər nəqliyyat vasitəsi nizamlanmayan piyada keçidinin qarşısında dayanmışdırsa və ya sürətini azaltmışdırsa, qonşu zolaqlarda hərəkət edən digər nəqliyyat vasitələrinin sürücüləri yalnız dayanmış nəqliyyat vasitəsinin qarşısında piyadaların olmadığını yəqin etdikdən sonra hərəkəti davam etdirə bilərlər. Çox təəssüf ki, videogörüntüdəki sürücü həmin qaydaya əməl etmədiyi üçün bu cür xoşagəlməz hadisə baş verib.

Xoşbəxtlikdən hər iki tərəf hadisədən zərər çəkmədən qurtula bilib. Lakin bu, faciə ilə də bitə bilərdi.

Könül Rauf