Lovğalıq üçün qayda pozan sürücü – Avtomobilin nömrəsini çıxarıb, qabağını qaldırıb - VİDEO

Paytaxtda həm qaydaları pozan, həm də “hoqqa” verən sürücü videolarını “Tik-tok”da paylaşıb.

Avtosfer.az xəbər verir ki, görüntülər sosial şəbəkə istifadəçiləri tərəfindən birmənalı qarşılanmayıb.

Belə ki, 77-PL-320 qeydiyyat nişanlı, "Khazar" markalı avtomobil sürücüsü paytaxtın müxtəlif yollarında ön qeydiyyat nişanını çıxararaq hərəkət edib. Həmçinin görüntülərdə sürücünün avtomobilin konstruksiyasına müdaxilə edərək qabağını qaldırıb, arxasını isə aşağı saldığı aydın əks olunub. Bəzi videolarda ön qeydiyyat nişanını avtomobilin alın şüsəsinə qoyub.

İlk baxışda sürücünün radarlara düşməmək üçün ön qeydiyyat nişanını çıxardığı düşünülsə də, sosial şəbəkələrdə paylaşdığı videolardan anlamaq olur ki, sürücü qaydaları sadəcə lovğalıq üçün pozur.

Bu tipdə onlarla video çəkib, “Tik-tok”da paylaşan sürücünün belə qaydalar pozması barədə saytımızda dəfələrlə xəbərlər dərc olunub.

Qeyd edək ki, sözügedən görüntülər xüsusilə də azyaşlılar üçün pis örnəkdir. Ümid edirik ki, bu barədə müvafiq qurumlar yaxın zamanda tədbir görəcək.

Məhəbbət Tərlanoğlu