Masazırda ölümə aparan manevr: Əks yola çıxan sürücü axına qarşı şütüdü - VİDEO

Abşeron rayonu, Masazır qəsəbəsində yol hərəkəti qaydalarını kobud şəkildə pozan sürücü avtomobilin kamerasına düşüb.

Avtosfer.az-ın məlumatına görə, hadisə iyulun 13-də saat 18:46 radələrində Əliağa Vahid küçəsində qeydə alınıb. Görüntülərdən məlum olur ki, 77-XU-919 dövlət qeydiyyat nişanlı “Toyota” markalı avtomobilin sürücüsü qarşıdakı nəqliyyat vasitələrini ötmək məqsədilə əks istiqamətli yola çıxaraq axına qarşı hərəkət edib.

Bu zaman o, qarşıdan gələn və görüntünü qeydə alan avtomobilin sürücüsü üçün qəza şəraiti yaradıb. Təhlükə ilə üzləşən sürücü operativ reaksiya göstərərək sola manevr edib və baş verə biləcək ağır yol-nəqliyyat hadisəsinin qarşısını son anda ala bilib.

Qeyd edək ki, əks hərəkət zolağına çıxmaq və qarşıdan gələn nəqliyyat vasitələrinin hərəkətinə mane olmaq ən təhlükəli qayda pozuntularından hesab olunur. Belə məsuliyyətsiz davranışlar bir neçə saniyə ərzində faciəvi nəticələrə, insan tələfatına və ağır xəsarətlərə səbəb ola bilər.

Nərmin