Masazırda təhlükə saçan avtobus sürücüsü irada əsəbiləşib görün nələr etdi - VİDEO

Abşeron rayonu, Masazır qəsəbəsində qayda pozan avtobus sürücüsü kameraya düşüb.

Bu barədə izləyicilərdən biri Avtosfer.az-ın “WhatsApp” ünvanına video göndərərək məlumat verib.

Hadisə fevralın 10-da saat 07:47 radələrində Əliağa Vahid küçəsində qeydə alınıb.

Görüntülərdən məlum olur ki, 535 nömrəli müntəzəm marşrut xətti üzrə hərəkət edən, 50-FD-833 dövlət qeydiyyat nişanlı “Isuzu” markalı avtobusun sürücüsü nəqliyyat vasitəsini dayanacaqdan kənarda, həmçinin “Dayanma-durma qadağandır” nişanının təsir dairəsində saxlayaraq sərnişin düşürüb. Halbuki hadisə yerindən bir qədər irəlidə avtobus dayanacağı mövcuddur.

Kadrlara əsasən, sürücü bununla kifayətlənməyərək daha bir neçə qayda pozuntusuna yol verib.

O, görüntünü qeydə alan avtomobili ötmək üçün bütöv xəttin tələbini pozaraq əks istiqamətli yola çıxıb və manevr zamanı nəqliyyat vasitəsini sıxışdıraraq təhlükəli vəziyyət yaradıb. Bu an avtomobildə olan azyaşlı sərnişin qorxu keçirib.

Bundan əlavə, avtobus sürücüsünün piyada keçidinə yaxınlaşarkən sürəti azaltmadığı və keçiddən istifadə edən piyadalara yol vermədiyi də videoda aydın görünür.

İzləyicinin sözlərinə görə, sürücüyə dayanacaqdan kənarda saxladığı üçün irad bildirildikdən sonra o, qarşı tərəfi ötərək qəza şəraiti yaradıb.

Nərmin