Maşına sayrışan işıq quraşdırıb təhlükəli manevrlər edən sürücü - 99-UA-993 - VİDEO

Bakının Xəzər rayonu, Şağan qəsəbəsində qaydaları kobud şəkildə pozan sürücü özünü videoya çəkərək sosial şəbəkə hesabında paylaşıb.

Avtosfer.az-ın məlumatına görə, 99-UA-993 dövlət nömrə nişanlı “Mercedes” markalı avtomobilin sürücüsü yaşayış ərazisində təhlükəli manevrlər edib. Eyni zamanda o, maşının ön şüşəsinə operativ nəqliyyat vasitələrinə aid olan göy və qırmızı sayrışan işıq siqnalları quraşdırıb. Digər görüntüdə də sürücü sərt manevrlər edərək özünü və avtomobildəki sərnişini təhlükəyə atıb.

Qeyd edək ki, İnzibati Xətalar Məcəlləsinin 342.9-cu maddəsinə əsasən, nəqliyyat vasitələrinin müvafiq icazə olmadan xüsusi (çox avazlı) səs və ya sayrışan işıq siqnalları ilə təchiz edilməsinə görə 500 manatdan 800 manatadək məbləğdə cərimə nəzərdə tutulur.

Nərmin