Maşını piyada keçidinin qabağında saxlayıb təhlükə yaratdı - 99-LK-176 - FOTO

Paytaxtın Xəzər rayonu Binə qəsəbəsində qayda pozan sürücü vətəndaşların narazılığına səbəb olub.

Avtosfer.az xəbər verir ki, Əli İsazadə küçəsində 29 iyun səhər saatlarında yol hərəkəti qaydalarının kobud şəkildə pozulduğu müşahidə edilib.

Belə ki, “QAZel” markalı, 99-LK-176 dövlət qeydiyyat nişanlı yük avtomobili piyada keçidinin yaxınlığında park edilib. Fotodan da aydın görünür ki, nəqliyyat vasitəsi piyada keçidini zəbt etdiyindən piyadaların təhlükəsiz hərəkətinə maneə yaradıb və onları yolu keçərkən çətin vəziyyətə salıb.

Qeyd edək ki, yol hərəkəti qaydalarına əsasən, nəqliyyat vasitələrinin piyada keçidinin üzərində, eləcə də piyada keçidinə 5 metr qalmış və keçiddən 5 metr keçənədək dayanması və ya durması qadağandır. Bu tələbin pozulmasına görə sürücü 40 manat məbləğində cərimə edilir.

Fatimə Dadaşova